海洋公園今年搞嘅「哈囉喂全日祭2018」，為咗配合具視覺震撼嘅「堅係驚」互動景點，以及「Sanrio characters HELLO-ween聯萌派對」，9月19日至11月4日期間會呈獻驚慄至萌套餐，招呼一眾愛驚嚇嘅大膽鬼或鍾情魔幻萬聖節嘅「萌主」。
急症室餐廳有喪屍侍應
其中海洋冰室會變成急症室，餐廳入面滿佈鮮血淋漓嘅斷肢內臟同冷冰冰嘅醫療工具，工作人員仲要係喪屍醫生，唔知大家見到呢個環境，仲有冇膽量享受極盡驚嚇嘅血色盛宴？屆時據知前菜如「靈魂之窗」同「曲張靜脈」，以及主菜「天殘掌」（煙肉燒雞卷）或「幽靈鬼手」（焗鮮茄雜菜釀燒烤菇）等會放喺托盤一齊送上枱，畀食客自行開刀施手術。
海洋公園同時與Sanrio聯乘呈獻一系列限定哈囉喂至萌美食，等怕咗地獄嘅食客，可以揀返天堂嘅味道，以一班萌爆Sanrio角色例如南瓜伯爵造型嘅Hello Kitty、玉桂狗同Little Twin Stars等為主題，等粉絲同遊人盡情發揮「萌」聖節色彩。