七月十五日先至打完世界盃，話咁快昨日英超2018至2019年度球季又開鑼，啲世界級球星雖然話周薪好高，但成年嚟計，實在踢得辛苦，幾乎係全年無休，即使得咗世界盃冠軍，如普巴等，咪只係得三個星期休息，其實好唔夠，與NBA相比，天皇巨星占士在季後賽冠軍爭奪戰失敗之後，有三至四個月假期先至投入季前訓練及熱身賽，美式足球更係由二月唞假至九月，球員着實比歐洲足球明星休閒得多。
上季開賽後一周，本欄（2017年8月20日）就預測英超冠軍係兩曼之爭，果然中的，但點會諗到曼城贏得咁輕鬆，破盡紀錄吖。曼聯令人跌眼鏡，雖然係第二名，其實表現比較差，本欄又叫做估中熱刺與利物浦可爭第三四名，車路士與阿仙奴唔多掂，如果講係買賽馬四重彩，單式膽（曼聯）拖五腳中晒，雙膽（曼城曼聯）拖四腳又中晒，下一季跑馬有咁叻就盞鬼咯。
今季又如何？睇季初熱身賽與備戰狀況，曼城可以有機會成為2009年之後第一支衛冕成功嘅球隊，中場加入馬列斯，後備實力大增，後防與前鋒都好穩定，中場更多人才，今季更加合作成熟，肯定係冠軍大熱門。有力威脅嘅唔會係曼聯，而係利物浦，熱身賽表現出色，上季利物浦係曼城尅星，今季一樣係格食格，暑假增兵之後，實力更見雄厚，輪更替換都唔會太過削弱實力，但利物浦戰術（全場高位緊逼，快速行軍，力求搶攻）對球員體力要求極高，英超及歐聯賽事頻密，利物浦球員會唔會輸在最後階段呢？曼聯熱身賽踢得一團糟，狂人教練摩連奴似足怨婦爭米飯（用錢收購球員也），又聞普巴不滿摩連奴嘅保守戰術有意轉會，可見曼聯軍心不穩，點有實力爭冠軍呀？熱刺冇增兵，車仔依然故我，隨時會畀皇馬拆骨搶走明星球員，阿仙奴頂多係爭前四嘅啫，由美國老闆私有化之後，更不知是禍是福，所以今季大膽預測，英超前四名會係曼城、利物浦、熱刺、曼聯。車仔與阿仙奴頂多爭入前四。今季值得留意新人係曼城中場18歲嘅富頓（Phil Foden），佢17歲已帶領英格蘭攞U18世青盃冠軍，有腳法，有膽識，傳球助攻有板有眼，佢在四年後世界盃應可取代阿里嘅位置。英格蘭最缺乏有創意及控制節奏嘅中場球員，碰巧曼城有兩位一級中場（迪布尼與施華），可以畀富頓偷師，佢可以成為英國新希望㗎！