賓架P請大教授吃午飯，叫埋左丁山作陪，坐公司車由中環直駛至沙田馬會，上到Centurion，大教授已在，同幾位中大教授傾緊偈。呢度環境清靜，食客不多，益晒鄰近嘅中大教授在此開餐縱論世界大事、學術新知。分別坐好後，我地問大教授真正退休，連商界兼職都無做之後，有何消遣？點知大教授話：「我唔出埠嘅話，日日返回中大研究所，而且係最早到、最遲走嘅！」咁勤力，就係繼續讀書，看學術論文，及自己做研究，孜孜不倦。
賓架P請吃飯，為的就是問吓中美貿易戰及內地經濟問題。大教授講：「從所有數字推斷，貿易戰涉及頂多5000億美元貨物，收10%至25%關稅，算夠25%嘞，涉及款項大約係1250億美元關稅，實數應該低好多，係2016年中國GDP總值11萬2千億美元之1.12%，不足2018年GDP之1%，中美雙方都可以應受得起，故此問題不算大，實質影響較微，但有心理影響，以後環球經濟增加不穩定性。大家又估唔到特朗普之變幻莫測，總之係借貸要小心。」
賓架P又問內地公司債券違約日多，P2P網貸平台輪住爆煲，中央是否見死不救，因為違約者不少係國企省企也。教授說：「自1998粵信破產（當時由王岐山來港與香港銀行談判）事件之後，中央已大約有一條準則，就是散戶可獲賠償（如十萬元人民幣或以下），大戶及其他債權人要『削頭髮』，近幾年來成日講『去槓桿』，去得咁上下，自不然有企業違約，後果由金融機構自行負責，中央一定不會挺身而出，對央企或者例外。」有此原因，近年所有外資銀行對內地企業信貸及買入債券之風險睇得好緊，不會輕易批出信用額度，尤其是在貿易戰期間，就要用番美國銀行家之老格言：「When in doubt, say No!」
吃到甜品，問大教授會否回美國放暑假，教授話：「冇必要唔去美國咯，啲TSA實在太煩，千祈咪同佢地鬥嘴表示不滿，否則實遭殃！」入美國境之「可怕故事」實在聽得太多，最近在一個酒會八卦聽到一位富豪名人年青時留學美國，最近去美國旅行就備受TSA（安檢人員）無禮對待，嚴苛到唔出得聲，一出聲呀，TSA即叫你企埋一邊，等上司處理投訴，一企就會係個多小時，冇人睬你！另一位富豪之護照有英文名字，不知是否與他人同名相撞，每次入境都有TSA「特別招呼」，搜身不遺餘力。美國最近有一位女士入稟控告TSA粗暴無禮，但法庭裁決TSA不是執法人員，而是聯邦政府行政特員，控告執法人員粗暴之條例，並不適用於TSA，因此婦人敗訴。以後TSA更有恃無恐，大家入美國境千祈要低聲下氣！