家吓一聽到啟德兩個字，就係貴，不過，遲吓一聽到啟德兩個字，可能就係「紅」。八方聽聞，九龍城喺明年區議會選舉有一個新選區，將會劃喺呢個滿佈貴價私樓嘅啟德一號、煥然壹居嘅位置。聽聞至今民主派未有人落去做開荒牛，但有阿爺水喉射住嘅建制派，就已經派咗嚟自香港菁英會、曾經拍片力撐左校校長蔡若蓮嘅梁思韻（圖），落去準備入閘，牌頭叫做「守望啟德」。
新選區旁邊係啟晴邨、德朗邨，呢兩個早已被建制派攻陷嘅「紅區」，如果民主派明年區議會選舉冇人挑戰呢區，成個啟德將會變成第二個北角。八方聽聞，民主派半年前已討論係咪要派人落去搶位，但礙於大家都要照顧自己本身嘅選區，根本無資源去開發呢個新區，所以呢區中產明年又可能要由建制派「被代表」。