青衣長安邨上演街頭霸王，主角唔係阿龍、春麗，而係花甲鄉音大叔同埋的士大佬，結果不分勝負，雙雙掛彩，仲要畀阿sir拉埋，唓！
話時話，兩位一把年紀做乜咁好火？住喺長安邨嘅王先生周二（17號）凌晨喺屋企準備瞓覺，突然聽到兩個男人嘈交，「爆晒粗，互相問候阿媽！」當佢行到窗邊望時，已見到兩位年紀唔細嘅阿叔拳來腳往，上演火爆街頭。懷疑係乘客嘅白衫男，一路出拳一路爆粗。
保安充當和事老
打打吓，兩位阿叔仲扭作一團，白衫男以滿口鄉音問「我冇錢畀你咩？」的士司機連鞋都甩埋，保安哥哥夾咗喺中間，嘗試做和事老，「咁樣打架有乜謂呢？」但係睇嚟作用不大。的士司機節節敗退，於是上返車避風頭。
不過，原來的士大佬並非省油燈，上咗車一陣後，好似充完電咁即時還擊，向鄉音阿叔一記左鈎拳，對方即刻慘叫並後退「我隻牙甩咗呀！」
王生估鄉音阿叔要求司機駛到安潮樓，但因為條路係消防通道，係留畀緊急車輛使用，而且要保安員開鎖車輛先可以駛入，根本唔關的士司機事，「保安唔開，司機都冇計㗎，我覺得個阿叔好無理囉！」王生所住嘅大廈隔籬就係停車場，經常都會聽到居民因為上落車問題嘈交，但出埋手就係第一次見。
警方證實，凌晨約零時44分接獲報案，姓黎（59歲）的士司機與姓潘（63歲）乘客，在長安邨停車場對開因為落車問題發生爭執及打架，事後同涉「在公眾地方打架」被捕，潘另涉「刑事毀壞」被捕，兩人分別嘴及手面受傷，需送院治理。