唔知由幾時開始，大家鍾意企喺馬路中心影相，仲要係車來車往嘅旺角，到底佢哋有幾熱愛攝影，要拎條命仔去較飛呢？各位司機真係要睇路呀！
上個月，有準新人企喺彌敦道影婚照，引起網民圍攻之後，喺呢個位置附近，又有一對男女上演「在馬路中心呼喚愛」，話說7月17號上晝10點半左右，讀者李先生喺旺角彌敦道雅蘭中心對面等巴士，其間竟然見到一對肥瘦男女企咗出馬路，「set晒腳架企喺度，我叫佢哋行返入嚟，好危險！」
但係呢對熱愛攝影嘅男女，行咗埋路邊一陣，攝影男又走返出馬路中心，企喺石壆向巴士站方向舉機，而女伴就企喺巴士站。
叫人去下個站搭車
「我估佢哋想影舖頭，有兩位女士想上車，但係影相嗰個女人竟然趕人走，叫人去下個站！」雖然當時未係繁忙時間，但係間中都會有貨車駛過，非常牙煙。佢哋嘅驚險舉動，引起駕駛人士注意，部份更加停車了解。
李先生話，自己以前都係攝影師，但唔會因為影相而搵命博，「要影咪企喺斑馬線，或者用支長鏡影埋去都得啫！」李先生炮轟呢對男女，除咗罔顧安全仲非常自私。