醫學會前晚開周年大會，做咗8年會長嘅蔡堅退下火線，交棒畀新任會長何仲平。蔡堅話，唔少醫生問佢係咪被「逼宮」，佢就話對方一定係睇《宮心計》睇得多，現實邊有呢啲劇情呢？只係何仲平有意接棒，佢又自覺精力不足想休息，自然就有呢個結果咁話。蔡堅又花咗啲時間講歷史，原來醫學會最初成立時係叫香港中華醫學會，直至1960年先改做香港醫學會，佢講笑話，如果今時今日可能會畀人抽秤「獨立」。
大會公佈新一屆會董選舉結果，會長何仲平、副會長林哲玄、鄭志文，同義務司庫梁子超自動當選。至於7個會董空缺就有9人爭逐，眼科醫生冼佩儀獲得1,058票成為「票后」，順利連任。不過，西醫工會主席楊超發同內科醫生張漢明就「落馬」，換入「新丁」前公共醫療醫生協會會長吳志豪、心臟科醫生林賀同腎科醫生陳小劍。