天時暑熱，米奇家族零舍活躍，四出搵食。上星期稻香青衣城分店，被發現有老鼠出沒，事隔幾日，又有讀者影到老鼠喺同一分店現身，而酒樓嘅碗碟繼續放喺當眼處，無遮無掩。
李小姐15號（周日）夜晚11點幾，同朋友喺青衣城食完飯，企喺商場中間望落位於地下嘅稻香酒樓，即時嚇咗嚇，「我見到3、4隻老鼠行來行去，好大隻，好惡心！」
碗筷放籃冇冚蓋
由李小姐提供嘅短片見到，有兩隻老鼠喺碗碟櫃下面穿梭，而部份碗碟、筷子、杯等只係放喺籃入面冇冚蓋，而一個滿佈茶漬餸汁嘅膠兜，更隨地放，另一隻老鼠走咗出大廳，好似熟客咁一派悠然。
李小姐認為，職員將碗碟隨處放，明顯缺乏衞生意識，而有關酒樓亦唔係第一次發現鼠蹤，但做法都冇改善，一旦老鼠爬過食具，食客分分鐘食物中毒。
稻香集團對事件表示極度關注，強調內部一向有嚴格衞生管理同執行標準及培訓，近月鄰近周邊商舖有大型裝修工程，事件發生後集團已即時安排業務總監同分店負責人，仲有商場管理處同防蟲公司開會，共同商討對策同加強措施，將分店所有可見縫隙封住，防止老鼠進入，亦會對分店巡查管理，並會將同事嘅防蟲訓練升級。