香港書展噚日開幕，大會通常會搵名人分享閱讀經驗同心得，噚日就有政務司司長張建宗去咗書展同後生仔分享港獨，吖唔係，係講讀……書心得，原來小肥張平日最鍾意睇時事書籍，又鍾意睇報紙，但估唔到因為呢個習慣，有時都搞到老婆唔高興。
剪報辣㷫老婆
小肥張同班後生仔講，佢自己其實係新聞發燒友，所以求學時期最鍾意睇時事書籍，細細個已經聽好多外國電台增加知識。
佢話𠵱家每朝5點半就起身，仲話每日唔睇報紙唔舒服，朝朝都刨14份報紙社論、睇埋中外報章對香港嘅觀點㖭，連做嘢時候都要一直睇新聞台，而且佢仲會剪齊晒啲報紙保存，不過佢剪報紙呢個習慣，搞到太太有啲唔滿意，因為小肥張儲埋啲剪報會惹蟻。
講起老婆，係人都知小肥張係工作狂啦，今年書展係愛情文學做主題，佢就乘機放吓閃，話「我係好幸福㗎！」因為自己工作咁忙，「我太太都好諒解我」，又話家庭係每個人嘅避風港，「講真話只係（對）家人（講）㗎箒！」不過呢記者問佢係咪政治打壓民族黨，佢就乜都冇答一支箭走咗去，唔知係有咩真話唔可以同大家講呢？
除咗小肥張，特首林鄭月娥都去咗書展開幕酒會，佢致辭時講到閱讀好處，亦不忘顯示佢心懷祖國，話有次佢留意到中央電視台有一個推廣閱讀的廣告，話「每一次閱讀都是一次身心的光合作用，帶我們發現更好的風景，讓我們在閱讀中發現世界」，令佢好有同感，其實娥特係咪想曲線講，佢平日都係睇cctv呢？講番轉頭，娥特曾經都自稱係本港紙媒嘅忠實擁躉，仲每朝會用45分鐘讀9份報紙㖭。
李八方