上週日看林夕專欄，才知道黃大仙祠搞「孔子開筆禮」，位位盛惠一百。一張紅衫魚，就得到蜚聲國際的天神級名師孔子，保佑你子女的學業，三個字：抵到爛！莘莘學子向來拜文昌帝君，點解轉會呢？黃大仙揸fit人稱，不想大眾太迷信，孔子至少是歷史人物，萬世師表，才誠邀他加盟。但文昌梓潼帝君也是歷史人物，相傳化身為蜀王張育，古時在四川響朵，保佑舉子高中，神蹟彪炳，哪方面比不上孔子呢？難怪夕爺替文昌不值。但計我話，識得拜，一定拜王維。
孔子一生，風塵僕僕，未獲君主重用，有人甚至乎形容他「纍纍若喪家之狗」。王維厲害得多了，不但是狀元，且多才多藝，寫得一手好詩，工書善畫，妙通音律，官至右丞，還生得青靚白淨，談吐幽默，簡直是完美男神。更重要的，是他懂得「走後門」，今天實撈得好掂。據唐人薛用弱《集異記》，王維二十歲到京城赴考，聞說狀元已內定是宰相張九齡的弟弟張九皋，因為張得到公主首薦。王維的友人岐王度了一條橋，叫王維準備十首呃like詩，並作曲一首。然後岐王給王維穿上伶人的華服，帶他造訪公主。公主見維「妙年潔白，風姿都美」，已對這小鮮肉萬分驚艷；接着王維以琵琶獨奏一曲，「聲調哀切，滿座動容」，公主詢問歌名，維說是《鬱輪袍》。公主再讀他的詩，簡直醉了，即引為上賓，「維風流蘊籍，語言諧戲」，公主大悅。岐王乘機說項，請公主推薦他，此時公主已成「王粉」，結果當然是DQ張九皋，叫試官點王維做狀元了。
以上故事不見於正史，不知是薛用弱虛構抑或爆料，但無論如何，王維識字又識人，顯然是現代社會成功典範。小朋友，係咩驅使你拜文昌、孔子呢？係求分數，抑或求學問？家長會答：「係求搵銀呀，D你個H！」既然係咁，要拜都拜人生勝利組，點會九唔搭八，走去拜個戰死沙場嘅張育或「喪家犬」呢？