世事係咪冥冥中有主宰？同一條路同一個位置嘅個半鐘頭內，竟然先後有兩架私家車撞冧同一個安全島燈箱，不過唔同嘅係前面架車開車走咗，後面架車食咗死貓，要賠返毀壞公物的維修費用。
首名司機不顧而去
話說噚日朝早近11點，有巿民目擊一架中港牌黑色七人車，沿灣仔道行駛至近活道交界時突然失控，衝前撞爛安全島上一個燈箱，但司機冇停低，就咁開車走咗，有網民拍低意外情況再上載群組。
無獨有偶，到中午12時兩個字左右，一架白色私家唔知發生乜事，突然失控衝上安全島，咁啱得咁蹺就咁推冧咗燈箱，30歲姓丁司機其後報警，由警員到場處理，個毀壞嘅燈箱好大機會入佢數。記者向警方查問事件，的確只有12點左右有一宗同類車禍，但之前係無人報警，換言之，之前個司機係撞車後不顧而去。
由於兩件事都有網民上載相片，猶如平行時空發生咁詭異，引起唔少網民熱議，有人話兩位司機「謀殺咗個燈箱呀」，亦有人替後車司機不值，認為佢「硬食死貓」。