中美貿易戰開打，港商都呱呱叫，最驚殺到埋嚟牽連甚廣。中華出入口商會會長張學修同傳媒聚會時就開盤，話個人估計中美貿易戰唔可能喺一、兩年內解決，叫商界同社會都要做好心理準備，形容呢場係「持久戰」。咁係咪有影響已經浮現？佢話現階段嘅關稅清單主要都係集中汽車同航空業等等，查實對香港嘅負面影響，暫時未浮現嘅。
料內地出旅遊禁令
之不過呢一場仗對於佢嚟講，真係忠字行先過利益嘞，身兼全國政協委員嘅佢話中美貿易戰關乎國家利益同民族感情，所以即使對本港經濟有影響，商會都會服從國家嘅決定，仲話內地早前對日韓發出嘅旅遊禁令成效好顯著，日後如果有需要，相信內地都可能會對美國採取相同嘅抵制措施，限制國民去美國留學或旅遊。
呢個建議一出，網民拍手叫好，少咗強國人去美國，遊走更鬆動，力促中國快啲出「禁美令」，唔好只講不做。