熟悉中國時局嘅劉銳紹唔知係咪因為敢言，有傳遭西環落咗「封殺令」，有傳媒唔再搵佢評論時政，但原來人稱「夫子」嘅佢自細已經唔向強權屈服。今年63歲嘅夫子出身基層家庭，自細喺灣仔大。爸爸做電燈工人兼積極參與反英抗暴，夫子小一入讀左派工人子弟學校，其後讀嘅係官校，包括賽馬會官立小學、北角官立小學同丹拿山警察子弟官立小學，無乜受過左校「洗腦」。佢自揭兒時做過幫左派偷運《毛語錄》及傳單等嘅「小鬼隊」，主要受爸爸影響，後來觀察到反英抗暴有好多不可思議嘅盲目，包括叫人食豬餿去憶苦思甜，令佢清楚運動已變質。
夫子憶述小五、小六讀丹拿山小學時，同學都係警察子弟，佢係唯一左派後代，人生第一次唇槍舌劍就喺呢間學校練返嚟。升中試考獲佳績獲發獎學金，入讀灣仔聖璐琦書院至中學畢業，師兄包括藝人陳百祥！
聖經科交白卷仍考三甲
講起中學趣事，夫子記得中學時神父叫佢一定要信天主否則會落地獄，佢仍然堅持「我入地獄係我自由」，最終更喺聖經科交白卷抗議，但佢當年仍考到前三名。
中學畢業後因為覺得左報記者係當時最易搵嘅工，加上不滿港英政府壓迫港人，所以入咗《文匯報》做記者，一做18年。佢透露當年喺 《文匯報》 返工前要先進行「政治學習」會議，74年國內「批林批孔」其間佢因為堅持個人立場，唔認同內地官方批鬥孔子嘅口徑，畀同事笑「劉夫子保孔夫子」，「夫子」呢個花名一直叫到𠵱家。