與電腦J在上海總會吃過午飯，一齊步行去上環，佢話有位朋友醫生約咗飲咖啡，講個名出嚟，咁啱又係左丁山識嘅，於是一同行去打個招呼！
呢位朋友係女醫生，在公立醫院工作多年，已經係Senior級數，見面問好之後，問醫生F為何事出中環？醫生F話，受朋友所託，走嚟睇吓有乜地方開醫務所。咁就真係艱難，幾間醫生大廈已滿是醫生，插針不入，老牌大廈德成大廈即將拆卸重建，醫務所紛紛搬走，另租地方。呢個時候要在中環搵地方開醫務所，算是時機不合。
好好地做開公立醫院高級醫生，做乜要辭職？醫生F話：「非也，只係幾位朋友快到退休年齡，佢地見醫院人手短缺，做得好辛苦，諗吓不如提早退休，搵多幾年再睇情況，先至真正退休。」即是咁，有經驗醫生離開公立醫院，由新畢業醫生補上，要睇老經驗醫生，唔該畀錢多啲。
醫生F話：「其實並非完全為銀紙嘅，做公立醫院醫生真係辛苦，人手唔夠，工作時間長，一時做到頭昏眼花，發生醫療失誤的話，我地就要承受極大心理壓力，個心過唔去。現在女醫生有咗兒女，考到Fellowship（專科院士）之後，就傾向辭職，有理冇理休息幾個月先，橫掂有咗Fellowship之後，大把醫療中心爭住請。」
咁醫生F會唔會走呀？佢話：「唔會，我一於做到退休，我未搵到新人接班，盡量畀機會佢地做多啲。」突然省起向錢看，多問一句：「現在有醫生考Fellowship邊一個專科最有前景？」估唔到一問之下，醫生F大把嘢講，唔知係唔係同電腦J老友呢，佢又講AI喎：「未來開發新藥越來越難，診症，檢查身體，必定會倚賴新式AI電子儀器，利用大數據，診症比我更快更準。例如做微創手術，打麻醉針用AI計算麻醉藥份量，可能更加精確，麻醉醫師變成可有可無，我近年在醫院見到好多兒童精神有問題，精神科病人不斷增加，我諗諗吓，做精神科與心理分析，病人傾訴情況，唔鍾意對住機械人講自己心理嘅啫，人與人對話，應該更容易解決精神病，精神科又似太極內功，愈老愈經驗豐富，功力更好，如果我今日從頭來過，我一定主攻精神科，考Fellowship。」AI可以代替工人，原來一啲醫生亦可能被代替，因住無工做呀！