陳小姐趁七一回歸假期快閃東京，點知5日4夜嘅行程因為HK Express航機延誤，白白冇咗一日。
話說7月1號佢搭下晝1點05分UO646航班飛東京成田，12點幾登機，機長廣播成田機場實施航空管制要delay兩個鐘，之後新廣播層出不窮，前後講咗6個原因飛唔到，包括有乘客冇上機要卸番佢啲行李落嚟、機件故障、機組人員夠鐘換班、有乘客要求聯絡地勤、轉飛羽田空港要加油。
等啊等，有人鼓譟報警，班機200幾人呆等6個鐘最後都飛唔到，全部人落機。
航空公司安排乘客當晚入住機場酒店或派500蚊現金畀人搭車返屋企，陳小姐話：「全程得一個人（航空公司職員），你覺得一個人可以應付到我哋咁多個人咩？」連行李都搞咗一大輪先攞到，佢嗰晚10點幾先上到酒店房，「喺機場折磨咗10幾個鐘，人都癲!」
行程失預算掃興
航班喺第二朝（2號）9點幾起飛，去到東京已經係當地時間晏晝3點幾，陳小姐原本租咗車，行程大失預算，真係好掃興。另一個乘客呂小姐原本同朋友一行8人去東京自由行6日，一樣咁嬲，「憤怒同無奈，永遠都唔會再用HK Express！」
HK Express發言人稱，當日UO646航班因香港國際機場實施空中交通管制而延遲起飛，之後亦因唔同因素再度延誤，最後因成田空港實施宵禁而要將航班延至7月2日出發。
HK Express已經即時為受影響嘅乘客提供小食及飲品、派發餐飲券，以及港幣500蚊現金交通津貼或者酒店住宿安排，又派發航班延誤證明畀乘客claim保險用。HK Express對航班延誤令旅客造成不便深表歉意。