邊個阿媽阿爸咁狠心，一個被街坊形容為「白白淨、肥嘟嘟」嘅3歲半男仔，前日下晝近5點身穿藍色T恤、啡色短褲，被街坊發現佢自己一個喺秀茂坪順天邨嘅公園徘徊，街坊通知保安員報警。差人帶住佢喺邨內兜圈，都搵唔到佢嘅屋企人，於是送佢去聯合醫院做身體檢查。但根據警方初步調查，個男仔懷疑被人丟低之前，係同一個大約40歲黑黑實實嘅男人一齊喺邨內快餐店食嘢。
有簡體字書包喺快餐店搵返
有讀者噚日喺順天邨天權樓地下一間快餐店食嘢嘅時候，見到有警員調查緊單案，《蘋果》即刻趕去了解，見到差人翻查快餐店嘅CCTV，原來職員執到一個校名有簡體字嘅幼兒園書包，唔知關唔關個男仔事，所以報警。據講，差人睇過閉路電視片段，前日下晝大約兩點，有個皮膚黝黑嘅男人同個男仔一齊食嘢，佢哋都係講普通話，而個書包入面有張男仔嘅相，但冇手冊，差人之後將個書包帶番差館。
記者喺邨入面問過好多街坊，有媽媽同附近地盤女工都話，前日下晝喺天暉樓對開嘅遊樂場見過嗰個男仔。據甘女士話，有街坊當時曾經問過男仔啲嘢，唔知佢係唔係唔識答，冇乜出聲。甘女士仲話，啲媽媽谷（網上親子群組）議論紛紛，「有人估係唔係個小朋友身體有乜疾病，帶嚟香港丟低？」但佢睇男童幾精靈，唔似有病。
觀塘區區議員莫建成話目前為止，未掌握到個男仔係唔係條邨嘅街坊。警方話個男仔冇受傷，但暫時仲未聯絡到佢嘅父母，將案件列作對所看管兒童或少年人虐待或忽略。警方呼籲任何人如果認識男童嘅父母或有佢哋消息，第一時間聯絡警方。