如果大家自問中文夠班，有信心可以靠寫字搵食，政府新聞處以月薪近86,000蚊招聘「中文撰稿主任」，呢份筍工，絕對不過容錯過。
用得呢個價錢請人，新聞處要求唔低，除咗大學畢業，仲要有10年做過新聞或者公共關係嘅經驗，如果冇「沙紙」，都要有過15年中文寫作經驗，申請人亦要熟悉時事新聞。但呢份為政府擔任「文膽」嘅工作，工作量絕對唔輕，寫演詞、題辭、新聞稿、報告、宣傳刊物不在話下，仲要編輯、翻譯有關新聞、宣傳及廣告資料，並要為初級員工主持中文寫作工作坊提供內容培訓，即係唔只係中文要叻咁簡單。
呢份工合約期只有一年，續約與否睇新聞處需要同埋員工表現，份工唔係公務員鐵飯碗，吸引力係咪差咗少少呢？不過月薪8.6萬仲要有15%約滿酬金，絕對夠晒賣點。自問中文頂呱呱，又做過傳媒同公關工作嘅人，快啲把握機會下月5日或之前申請啦。