海洋公園夏日重頭戲「動夏嘉年華」將於本周六登場，活動投資逾3,700萬，由全球招攬多隊表演隊伍來港演出，每日早晚都會舉行大型巡遊，各處仲有唔同街頭快閃表演，好似古巴戰舞等，帶出加勒比海動感夏日嘉年華氣氛，活動期間逢周五、周末晚上仲會開放「夢幻水都」人工湖，畀遊客免費入場參加DJ電音派對。
有別於往年以水為主題嘅「夏水禮」，今次「動夏嘉年華」將以海洋生物、野生動物及雀鳥為主題，表演者會化身成不同動物加入巡遊，至晚上巡遊更會「升級」成為夜光派對。園內怡慶坊就會有集音樂、舞蹈、雜技於一身的奇技大匯演，另外亦邀請到韻律泳選手喺海洋劇場表演，不過為咗畀遊客消暑降溫，活動期間威威天地仍設有嬉水設施同泡泡派對。