中區統一碼頭道38號海港政府大樓噚日朝早11點幾，地下人頭湧湧，個個西裝骨骨，原來大樓發生火警，地下一間士多房起火，冒出大量白煙，仲湧到上寫字樓走廊，大廈內約210人自行疏散，無人受傷。消防接報到場，出動咗一條喉及一隊煙帽隊灌救，15分鐘將火救熄。
離島區議會正開會
消防調查後初步唔排除火警同燒焊有關。據了解，火警發生時士多房內無人，疑有人之前工作時留低火舌引起火警。
一位職員話，開始只聞到類似火警後嘅燶味，仲以為係前晚有火警，所以都無為意。不過無幾耐見到周圍啲人推門走，部份人掩口鼻，火警鐘亦響起，於是跟人群離開。
佢話職員全部都好有秩序，直至落到樓下時見到有煙，先開始覺危險，好在事件只擾攘咗約兩個鐘就可以重新開工。
海港政府大樓內有多個政府部門，包括入境事務處、地政總署、政府新聞處等，中西區同離島區區議會都係入面，噚日火警時離島區議會亦喺大廈入面開會。