無人機嘅應用越趨廣泛，有時仲會作表演用。嚟緊6月30日晚上7點半就會有全港首次嘅無人機戶外光影匯演，屆時多達100架無人機會隨住音樂，喺沙田城門河畔上空上演約10分鐘嘅大型燈光匯演，除咗係主權移交21周年紀念活動，亦為第八屆沙田節展開序幕，沙田友嘅最佳觀賞點，可能係瀝源橋同沙燕橋之間兩旁行人路，費用全免。
呢啲無人機查實嚟自億航智能公司，早前立法會議員去大灣區考察，連重量級議員金融服務界張華峰都擠得入嘅無人機，都係億航出品。據知香港各界慶典委員會7.1喺維園搞嘅嘉年華，億航都會有攤位，八方聽聞，一向支持創新科技嘅特首林鄭月娥，屆時或會同中聯辦主任王志民行孖咇撐場支持。