政府工一向吸引，即使只係合約職位，一樣爭崩頭，財爺官邸最近請傭工，透過公務員事務局喺勞工處網站招聘呢個職位，人工唔算高，但入職門檻低，識得煮嘢食，能夠操流利粵語、簡單英文同普通話就基本過關，主要職責包括家居清潔、洗熨同宴會烹調，月薪有17,080元，工作期24個月，合約完成仲有10%人工嘅約滿酬金。
財爺官邸耐不耐都會請傭工，年初先公開招聘同一職位，當時月薪只得16,065元，未夠半年就加咗6.3%人工，高過公務員薪酬加幅。如果你有3年喺大戶家庭或大型機構招待賓客嘅工作經驗，仲可以考慮申請財爺官邸高級管事一職，呢份工月薪有21,880元。人工高啲責任自然大啲，佢嘅工作仲要負責監督傭工做嘢同編更表。