警匪片大家睇得多，但現實版警察追捕疑犯嘅場面，可能你同我都未遇過。前日下晝5點幾，元朗就上演咗一幕差人捉犯嘅真人show，有個懷疑毒販揸Benz想走，但結果失控撞欄走唔甩，就係咁衰咗。
疑犯被擒 住所搜出毒品
當日，元朗警區重案組警員喺水蕉老圍掃毒，埋伏監視目標人，冇幾耐見對方出現攞車就上前截查。點知個男人發現有警察，即刻跳上部白色Benz開車走，其間仲撞到部貨車，但Benz男唔理咁多，踩油走。不過，Benz去到大旗嶺路燈位就失控炒欄，Benz男落車逃走，最後走得唔夠快，俾警員追到制服拘捕。
市民朱先生當時揸車經過，車cam影到Benz喺大旗嶺路燈位已經炒咗欄，車頭爛晒，有個男人落車後跨過欄杆，跳到車頭前面。朱先生話：「見佢撕走行車證同車牌，應該係唔想畀人知，然後跑入後巷不知所終。有4至5個差人追佢，有便衣亦有軍裝。」
疑犯走到索晒氣，但走唔甩，差人從後追上，最終制服涉案嘅22歲姓許男人。差人之後押疑犯返水蕉老圍嘅村屋住所搜查，結果喺單位內搵到小量可卡因毒品，市值大概2,000元。當時屋內仲有一個20歲姓謝嘅女人，亦都俾差人拉埋返差館。
警方經過初步調查，發現涉案Benz嘅登記過咗期，男疑犯有三合會背景，涉嫌藏毒、交通意外肇事後不顧而去，同埋駕駛未有登記車輛共3宗罪；女疑犯則涉嫌藏毒，兩人被通宵扣留調查，案件交由元朗警區重案組繼續跟進。