世界盃開鑼，熱門捧盃球隊一隊接一隊失分搞到一地眼鏡碎，而查實今屆未踢已經有唔少爆冷賽果，例如意大利同荷蘭入唔到圍，傷盡唔少粉絲心。原來前新聞主播方健儀（Akina）都係荷蘭躉，近日仲趁世界盃熱潮，攞返94年世界盃集圖冊出嚟重溫一番，嗰屆當時得令嘅球星，例如荷蘭柏金同意大利巴治奧等，佢都儲得齊。
八方問過Akina，佢話初中開始愛睇世界盃，以前睇得都算crazy，經常捱更抵夜，「近年要畀錢睇（因無綫沒有轉播權），我咁孤寒就少睇咗好多，哈哈。」她指當時情迷荷蘭，尤愛「冰王子」柏金，「覺得佢係進攻型（因柏金是前鋒），好似記者；後衞就有啲似公關。」94年首度買世界盃集圖冊，「我係好有意識去買，覺得男仔買得嚟儲，我都得啦。」自從喺fb貼出集圖冊後，Akina勾起唔少網友集體回憶，「有人仲問我儲唔儲得齊？儲唔齊佢仲有，可以畀埋我㖭！」
由於今屆冇咗愛隊，Akina話睇波都輕鬆咗，但日前睇「雙牙大戰」都好肉緊，大讚C朗冇得頂。