政府擬推嘅「一手樓空置稅」，近日惹起地產界大反撲。八方同事早前預告過，特首林鄭月娥結束歐洲訪問後返港，就係政策出台之日，否則邊個坐鎮主持大局？財政司司長陳茂波噚日去大埔觀看龍舟賽時證實，娥特返港後就會公佈空置稅詳情。咦，地產建設商會執委會主席梁志堅早前講過，雖然地產商冇諗住就此提司法覆核，但若然政府出招太辣或過份干預，唔排除個別地產商有其他想法喎；咁陳茂波怕唔怕有人真係提JR呢？佢回應話「唔使驚」，因為已就政策諗清楚喎。
而陳茂波今日傍晚會啟程訪京，其間拜訪財政部、商務部、科學技術部同港澳辦等，又會出席由民政事務局主辦嘅中國科學院青年實習計劃開學式等，22日下午返港，財庫局局長劉怡翔會參與部份行程。