律師會原副會長彭韻僖喺冇對手下接任會長，理事會仲決定將兩名副會長加多一位變三個，兩個星期後再選。點解無啦啦要加副會長？相信唔少法律界同八方一樣有疑問，律師會監察組因應坊間一大堆問號，撰文拆解。
根據律師會章程，每年理事會內坐得最耐嗰五個要退任，但如果做咗會長或者副會長，就唔使退任接受選舉洗禮。監察組喺佢哋facebook拆局，話估計現任副會長黎雅明（Amirali Nasir）如無意外會冧莊，而獲開明派同保守派支持嘅喬栢仁（Brian Gilchrist）亦有機會做副手。咁剩低一個位，花落誰家？佢哋話江湖盛傳，身兼港區人大候補委員嘅自由黨陳曉峰想上位，唔知係咪額外為佢開位？
空穴來風，未必無因，陳曉峰明年夠鐘落任理事，如果做咗副會長，咁就唔使出嚟再選，呢句監察組話嘅……而何君堯之前鼓勵會員將授權票交畀陳曉峰，唔通真係天將降大任於斯人也？