一波未平，一波又起，民協呢期認真多風波。繼盛傳元老級人馬馮檢基要退黨後，前日有市民致電網台D100節目《左右大局》，自稱「富昌邨街坊」話「有民協成員協助建制派派糭」，聲稱阿基已經退黨，仲同民協已經轉投建制陣營喎。
民協：係有核心支持者轉軚
轉軚咁嚴重嘅指控，民協當然即時澄清，強調最近係有一名核心支持者變心轉投其他人懷抱箒。佢哋發聲明指，呢名支持者最近同民協團隊已經冇聯繫，從佢近日區內舉措，相信佢已經轉投建制陣營，強調民協喺烽煙市民講述嗰晚冇委派任何人喺富昌邨派糭畀長者，重申呢個人嘅行動，絕非民協任何成員委派嘅事務。
民協強調絕冇同建制派有任何妥協同合作，尊重街坊嘅個人立場同取態，對於有支持者轉投建制陣營都感到遺憾同痛心。佢哋話會檢討同加強社區工作，以爭取市民同街坊嘅支持，喺社區栽植民主力量，力抗建制霸權為禍社區。
躺着也中槍嘅阿基則喺fb轉貼相關報道並慨嘆，「總是要無中生有」。據知《左右大局》前晚喺聽眾烽煙爆料後，監製已經喺節目結束前聯絡馮檢基，但阿基當時只話唔想回應，冇作澄清。