呢幾年，香港的手語傳譯越嚟越受重視，立法會會議直播時亦有提供手語傳譯。但係唔講唔知，原來一啲常用嘅政治同社會政策詞彙，好似「一地兩檢」、「滬港通」等，原來都冇統一嘅手語傳譯。
香港聾人福利促進會由2010年起為立法會會議、施政報告、財政預算案等提供即時手語傳譯，佢哋以累積多年傳譯社會、政治議題嘅經驗，出版名為《香港手語．社政》書同DVD，將時事同社會政策詞彙嘅手語結合同整理好，方便手語傳譯。
呢套書同DVD以香港社會、經濟、政治等分類為基礎，當中包括教育、經濟及財經事務、政制事務、房屋等約600個不同的香港手語，以相同影片形式示範，有興趣嘅市民可以喺今個月19日開始，去佢哋喺灣仔嘅總辦事處同各區中心購買。