提起袁嘉蔚（Tiffany），唔少人認識佢係因為佢係前立法會議員羅冠聰女友，亦有唔少人因為佢係眾志副主席，所以對佢有印象，但查實Tiffany上個月已經退出眾志，𠵱家主力服務社區，仲有個新朵叫做「田灣女孩」。呢位田灣女孩大學時已經投身社運，仲有一個好特別嘅崗位，就係負責寫Banner！
童顏累事 街坊質疑熱誠
1993年出世嘅Tiffany話自己由細到大都好外向，小學已經成日被老師委派任務，服務同學，去到中學當然亦係活躍分子，學校活動多數會有佢身影，而佢亦會組織同學做啦啦隊。
似乎佢嘅中學少女時代，都唔多熱衷於政治，Tiffany都話中學時期冇參加過社運；直至2013年大學一年級，做咗城大中文、繙譯及語言學系會長後首次參加元旦遊行，佢當時嘅崗位就係負責喺大Banner寫字，唔知係咪手字ok，開咗個頭之後，直至𠵱家社運界都有人搵佢幫手；最近嘅作品就係為悼念李旺陽逝世6周年集會寫Banner。
相信唔少人同八方一樣，睇完Tiffany嘅童年照，都會覺得佢個樣真係由細到大都冇乜點變，天生一副娃娃臉。Tiffany笑稱，「童顏」令到佢同街坊可以打開話匣，唔少人會問佢係咪啱啱大學畢業？更加有人以為佢啱啱考完DSE，但同時都有人覺得佢年紀細唔係認真服務街坊。咁可以點解決？Tiffany話，「惟有用行動證明囉！」