躁漢揸住支槍喺街頭掂行掂過？前日朝早9點幾，楊小姐返工經過上水新發街同新樂街交界一間小食店，見到個阿叔喺舖頭出面指住舖內係咁鬧，鬧鬧吓仲衝埋入去，同小食店負責人嘈起上嚟，鬧得好大聲，吸引唔少塘邊鶴圍觀。點知阿叔突然一手喺斜孭袋掹支槍出嚟擺喺腰後面，另一隻手繼續指罵負責人，楊小姐話淨係聽到粗口橫飛，根本聽唔清楚鬧啲乜，在場食客見到咁嘅場面，嚇到雞飛狗走。
不過負責人就好淡定，仲大大聲叫阿叔：「你唔好走呀，我報警呀。」阿叔話：「報警囉！」負責人報警，雙方爭持咗大約10分鐘，阿叔開始褪軚走人，過馬路嗰時依然揸住支槍手揈揈、繼續爆粗。
警方同《蘋果》講，伙記到場阿叔已經走咗，小食店負責人話嗰位阿叔騷擾食客，所以先同佢嘈，話佢拎咗個疑似打火機出嚟嚇佢，差人列做糾紛處理，莫非嗰把槍就係打火機？