前財爺曾俊華近期復出金融界，前日仲喺一個論壇對點評時下政壇現象，除咗嘲諷前特首梁振英「懷舊到要推廣華服」，亦暗斥建制派何君堯喺開會期間做facebook live、「做幼稚嘅鬼臉」令議會變得小學雞，話好懷念昔日議會紳士淑女議政！
向來鍾意開火嘅何君堯，俾薯片公開奚落，又點會唔反擊？佢噚晚深夜喺fb撰文回應，題為〈心黃盡露還是懵上心頭〉，已經好有火藥味。何君堯先指聽薯片批評有政客破壞制度同規矩，聽起上嚟以為批評嗰啲行為不檢議員，自不然抽水重提許智峯搶手機事件，點知，「噢！甚麼也不是！原來他指的是CY和我！真有點受寵若驚。」
話影「泛統醜態」係第四公權
繼而佢自辯話，估唔到喺立法會「扮演第四公權」，拍攝「倒（搗）亂議會過程」揭示「泛統醜態」係幼稚行動，然後竟然學人玩Fact Check，話薯片之前曾批評泛民「盡情破壞」，𠵱家竟「反舌相奚（稽）批評那些撥亂反正的人是破壞者」，又話好在佢做唔到特首，否則香港穩定繁榮危矣。不過八方特別睇番薯片2015年網誌，確實寫過用「努力興建，盡情破壞，彼此也在捱」歌詞談議會文化，但佢當時講「拉布戰」，希望議員善用時間唔好「拉布」，唔係解構緊議會嘅「幼稚」文化！唔少網民更踩何君堯，唔知醜走去話人！
識睇睇留言
Chu Chi Chung：高下立見。今時今日一個低三下四，不知廉恥為何物的人形物體可以做議員，就知呢個政府幾rubbish。
吳加義：笑料堯連薯片都笑佢。仲有咩好講。未諗好就講未用腦就做動作十足細路咁。話佢幼稚佢仲好幼稚咁話返人懵。
李八方