真人版大嘥鬼又出沒，今次係響應「減廢大挑機」活動！呢個活動由環境運動委員會聯同環境局及環保署主辦，環境局局長黃錦星喺facebook發佈短片，片中可見佢戴住「黑超」以特警身份出沒，向「大嘥鬼」灌輸「走塑」概念，呼籲指：「走塑or NOT走塑，阿鬼識得揀，要做大嘥鬼定慳神，都係一念之間，你哋又點揀呢？」預告今日起一連7日喺衣食住行進行減廢大挑機，會有各界KOL參與，齊齊拒做大嘥鬼，佢仲喺貼文標籤，自稱「咪嘥嘢局長」㖭呀！
而「咪嘥嘢局長」噚日出席公開活動時，則透露政府探討緊點樣為合適塑膠產品容器引入生產者責任計劃，指政府委託嘅顧問初步認為，可以優先就塑膠飲料容器引進生產者責任計劃，仲初步建議透過現金回贈安排，提供經濟誘因鼓勵市民回收飲料膠樽，亦可以考慮用智能回收機提升回收率，唔知呢啲建議，幾時真係會落實？