早前九巴發生兩宗「奇聞」，今次輪到新巴嘞！話說有網民喺「巴士的事討論區」facebook群組貼相，話見到架新巴車尾流出大量好似鮮血咁嘅紅色液體，驟眼睇仲以為架巴士撞傷途人，仲有人問係咪車底藏屍，都咪話唔恐怖！但唔少網民好快留言解畫，話只係巴士機件「漏油」，可謂虛驚一場。
樓主話呀，啲相係喺車長WhatsApp群組度拎出嚟，仲講笑話架巴士「月經到」，「奇洛李維斯回信之姨媽到」，吸引唔少網民留言，競猜架巴士究竟流咗啲咩油出嚟，搞到成地都係「血水」。汽車工程專家、汽車工業學會會長李耀培回應《蘋果》時就話嘞，巴士嘅油渣雖然都係紅色，但唔會好似幅相嗰隻咁深色，而且今次仲流咁多，估計漏嘅有機會係風油軚油或波箱油，佢話呢啲車用壓力油會以唔同顏色區分可承受嘅壓力，而其他車用油亦有唔同顏色，例如潤滑機油係黃色。
新巴發言人就話，單憑呢兩張相，難以追查件事嘅詳情係點，但強調公司一向着重行車安全，如果巴士行車途中有問題，會盡快安排佢回廠檢驗。