「民望高」高永文自從話唔排除考慮代表建制派出戰九龍西立會補選，記者每次見到民望高，都會問佢參加補選諗成點，好似噚日佢同民建聯立會議員鄭泳舜落小西灣商場，幫參加東區區議會補選嘅植潔鈴拉票，雖然佢話明唔講九西補選，一樣俾記者圍，但最重要係民望高人氣仲高過植潔鈴，被街坊拉住合照嘅密度，同阿舜比直情有過之而無不及。
阿舜一向有街坊緣，亦令佢喺九西補選打低民主派嘅姚松炎，但八方估唔到民望高喺街坊入面嘅人氣，似乎仲高過阿舜，佢一入商場就俾好多街坊拉住合照，唔知嘅人仲以為係民望高參選而唔係植潔鈴，但八方睇見民望高氣勢咁強，如果佢出戰九西，民主派真係幾頭痕！
參選與否 賴政府未有時間表
至於佢究竟去唔去馬？民望高話問責官「冷河期」固然係考慮因素，又話政府連補選時間表都未有，又點會咁快話到幾時有決定？