為咗快，可以去到幾盡？有網民前晚喺fb上載兩張相，地址相信係葵涌業成街盡頭嘅行人樓梯，可以見到一架巿區的士車頭朝下，車尾呈半懸空狀態，前半車身已經駛咗入樓梯範圍。
不過相信司機大佬發現如果一直駛落去，可能會失控炒車，最終停車熄匙。相中見車廂空無一人，估計司機已經離開現場，或者去咗搵人救車。
呢兩張相曝光後，引發網民熱列討論，唔少人訕笑的士大佬呢個舉動，係打算走捷徑開快車，笑言：「最快由業成街去大連排道嘅方法，識揸一定咁揸！」上載者亦不禁引用廣告名句：「哼！用愛膚堅啦！」暗指司機可能香港腳發作肇禍。
翻查地圖，如果依照呢個司機嘅駕駛路線，由業成街走樓梯落大連排道只需84米，但倒車出青山公路再轉入葵涌道，就要近2公里先可抵達大連排道，有網民估計司機貪快惹禍。