【本報訊】「嗱呢度睇明星呢真係一清二楚，邊個架車喺度、上車追蹤都好清楚，哈！」站在半島酒店一樓閣樓，77歲高級調酒師鍾金雄（Johnny）像個大頑童般指向大堂茶座，瞇起雙眼笑道。由1957年入職半島酒店至今，大半生奉獻給這位「遠東貴婦」，在Johnny雙眸中，哪些風景最難忘？拉開酒吧大門小酌一杯，聽他娓娓道來那些已逝年代的美好片刻。
記者：黃翠儀
戰後40、50年代，Johnny父親在半島任「captain」，15歲時父親急病逝世，「我阿媽帶我入嚟（半島）見餐飲部總管，畀份嘢我仔做下都好喎；我第一日嚟就住宿舍，200人一齊住。」自此沒離開過半島，他由派報紙雜誌的信差做起，4年後升為大堂酒吧「細路」，即學徒，「𠵱家無人做細路喇，新人喺調酒學校學識晒先入嚟。」
學徒生涯總是苦，但眼見Johnny那和年紀不符的強壯臂彎，輕鬆拉開笨重的酒吧大門，多年訓練始乎果效甚豐，「嗰個時代無雪粒機要鑿碎雪，『雄仔！返工去鑿碎雪啦！』鑿半條百五磅碎雪一定落到杯底先得，鑿完又要換雪櫃水，尤其天熱呢鑿到好辛苦。」
與同事夾錢學英文
來到魚蛋粉索價數十元的年代，Johnny當年由30元月薪做起，「人工嗰時都幾好使㗎喇，因為油炸鬼呀搭巴士呀報紙呀1毫子做單位。」有感不諳英語不利工作，他和十多位同事每人夾10元，聘請另一同事教書，「佢唔使教科書，買份英文報紙教成個月，例如噚日robbery，金舖被劫。」學有所成，造就他與巨星名人酒吧邂逅時不至於「雞同鴨講」。
Johnny一雙巧手曾為多少名人調酒，印象最深刻要數曾主演《亂世佳人》、已故荷李活影帝奇勒基寶點的Screwdriver，「我懶醒畀個螺絲批佢，佢笑笑地話Cocktail not tool！」這一款伏特加溝橙汁製成的雞尾酒，自此在酒吧流行。還有《桂河橋》男主角威廉荷頓、「占士邦」羅渣摩亞等，都曾是酒吧座上客，「嗰時佢哋一個保鑣都無，飲吓威士忌水之類，好好（容易）招呼㗎。」他漸成了酒店的「標誌」，他笑言很多客人經常專誠來找他，因喜歡他的「baby face」。
除名人逸事，吧枱上亦見證歷史大事，「我收過最多一百蚊美金貼士，美軍喎，平時啲客都無咁犀利，佢任你攞㗎，等陣返越戰返越南，『You take you take﹗』個lobby坐滿晒，叫『白飯魚』呀着晒軍服海軍soldier，嘩嚟喇！到喇有戰艦到喇！」到全民皆股魚翅撈飯大時代，巿道暢旺人人豪氣，「個個都食得唔計數！」
因有感情拒絕挖角
後來本港多間大型酒店陸續開業掀起一輪挖角潮，「1980年Regent開張，淨係廚房佬挖咗20個，即𠵱家InterCon。」跳槽後的前同事承諾新酒店升職加薪，卻從未成功打動這位半島酒保，「有感情喺度，唔能夠話人哋新酒店一開張就跟去。」
這份感情，他的熟客亦有同感，「有個熟客每年嚟住20日，住美國比華利山，富婆嚟，總係要搵返我同另一個同事招呼，次次Dry Martini飲2杯，識咗廿幾年，但97後佢冇嚟喇。」
另有熟客移民溫哥華仍堅持每年寄來花旗參，「佢畀咗個地址電話但我未去過，正式退休先搵佢。」年代轉變，現時做日本客、國內客多。
目前酒店約900名員工中，三分一年資逾10年，Johnny年資最深，現時只有他和一名廚師仍住在酒店。「我朝早返6點收2點，夜晚8點鐘瞓覺日日如常。」未有兒女的他，家中只剩下他一人，但孤身而不寂寞，酒店員工他大半認識，走過長廊不斷有人和他打招呼，猶如老闆出巡卻添上人情暖意。由「雄仔」到Johnny，眼前一身白色西裝熨貼筆直，用髮蠟梳起的髮型依舊一絲不苟，年紀未有為他添上太多痕迹，雙頰飽滿光滑，大半個世紀的繁榮與興衰，化為他的故事。