講開高永文同植潔鈴拉票，其實建制派噚日總動員幫植拉票，更有唔少建制派支持者到場幫佢打氣，但係唔係個個都受歡迎，好似平日逢周二早上，都會去行政會議示威區展示國旗嘅中醫師，今次佢去撐植潔鈴，竟然俾民記譚耀宗「訓斥」佢，真係估唔到。
話說呢名中醫師原來係東區選民，今次東區補選佢話自己有投票，仲投咗畀植潔鈴，而佢噚日身披國旗行過植拉票檔口，已經表現得好high，一度走埋去同工聯會王國興握手。
但因為佢披住國旗，當佢走去同建制派合照時，在場嘅「譚Sir」譚耀宗就表現得十分抗拒，仲出埋口叫佢唔好攞支國旗咁玩！之後譚直情用手推開佢㖭！譚Sir咁嘅反應自然令佢好無癮，惟有一個人離開。