有巿民話喺離島見到「蜂鳥鷹蛾」？前日（9號）蔡小姐同男朋友趁周末入長洲玩，夜晚7點幾佢哋喺海旁一間海鮮菜館食晚飯，當時全場爆滿，佢哋坐喺半露天位大擦海鮮嗰陣，一隻飛行物體突然高速飛過嚟，有食客見到驚到尖叫彈開。本身鍾意睇雀仔紀錄片嘅蔡小姐，初時望到「隻嘢」個頭似雀仔，個嘴又長，仲會喺半空懸停，以為係蜂鳥。
專家指香港冇蜂鳥
但望真啲隻嘢個嘴係條好長嘅吸管，頭頂有對觸鬚，個頭綠色，有對眼睛，對翼拍得好快同埋發出嗡嗡聲。蔡小姐趁佢定點喺半空嗰陣，先稍為見到佢個身有黃黑色間紋，有短毛，尾部散開。於是佢上網search吓，話似係傳說中嘅「蜂鳥鷹蛾」。佢喺罐汽水上面盤旋咗幾個圈，「飲咗」幾啖汽水，幾分鐘之後就飛走咗。
《蘋果》就問專家究竟「蜂鳥鷹蛾」係乜東東？點知生態教育及資源中心保育經理陳錦偉一聽到「鷹蛾」就哈哈笑，話以佢所知應該冇呢種物種存在。咁「嗰隻嘢」究竟係乜？佢揭盅話係飛蛾！仲話香港有兩種類似嘅飛蛾，一種叫「長喙天蛾」，「喙」顧名思義個嘴好長，用嚟吸花蜜；另一種叫「咖啡透翅天蛾」，同樣有吸管，特徵係腹部有啡紅色橫帶，相對難見，兩者屬於鱗翅目。
蜂鳥係鳥類，個嘴好長，仲會伸脷。蔡小姐見到嘅係長喙天蛾是也！陳錦偉估計巿民睇得多紀錄片，見佢定點飛行就以為係蜂鳥，相信係一個美麗嘅誤會。據估計，香港有2至3千種飛蛾。陳強調香港冇蜂鳥，北美洲先有，就算喺香港咁好彩見到蜂鳥，可能都係籠養走咗出嚟，但暫時都未有紀錄香港出現過蜂鳥。