前日廣發英雄帖，預告噚日下午同傳媒茶敍嘅民協前立法會議員馮檢基，各方都關注，佢會唔會喺席間宣佈退黨？點知喺噚日風雨交加嘅上午，馮檢基突然向傳媒發出通知，話茶敍「因故」取消，但就無講明具體原因。阿基喺採通中話對此深表歉意，會盡快安排另外時間再同傳媒見面。
近期政圈不斷傳出阿基會退黨消息，空穴來風，又點會無因？據聞民協內仲有唔少人極力作最後游說，始終阿基近乎同民協畫上等號，留喺度梗係好過離開，而且仲要正值九西補選嘅初段喎……民主派陣營任何風吹草動，都會牽一髮動全身，阿基要考量嘅嘢，相信都唔少。
雖然未知退唔退黨，但肯定嘅係阿基會另設民生政策新平台，重點關注劏房等問題，希望喺新方向再出發。