佐敦街頭前日凌晨夜麻麻，有三個MK打扮嘅大男人圍住架的士唔畀司機開走，除咗拍打車門同用垃圾桶阻路之外，有個仲好似成龍上身咁，爬上車頂掹住車邊，其間跌咗落嚟又爬過，十足拍戲咁。最後要警員將佢拉落嚟帶返行人路，究竟搞邊科呢？
被拋落地再爬過
話說呢宗紛爭，係因為的士司機車咗個呢三位仁兄識得嘅女仔，佢哋想截住部的士而引起。當時已經凌晨近3點，個17歲女仔同黑衣男喺油麻地佐敦道近彌敦道行人路鬧交之後，個女仔喺燈位前截咗部的士上車離開，黑衣男於是立即截住部的士。
不過就喺叫個女仔「唔好走呀」嘅電光火石之間，黑衣男疑似俾架的士「揩親」，佢就好激動咁，同另外兩個男人圍住架的士，三個人不停拍打的士門同玻璃窗，其間仲有人拉咗個垃圾桶去的士車頭，阻住部的士。呢個時候黑衣男就露吓身手，爬上的士車頂，仲整爛咗車頂燈箱，跟住佢又爬落車尾箱。的士司機見到咁都驚起上嚟，撞開垃圾桶開車走，結果黑衣男被拋起跌落地上。
據目擊者張生話，當時係紅燈，的士仍然強行駛出彌敦道，但行咗一半箒，有架警車已經到場攔住部的士。但黑衣男未肯罷休，又爬上的士，將身體大字形咁趴喺車頂，唔肯落車。阿Sir惟有合力拉佢落嚟，但佢仲好激動，想走去找司機晦氣，結果俾警員攔住制服，帶返行人路調查。
警方話，事件中21歲姓吳男子曾拍打的士車門同爬上車頂，佢兩個姓劉（39歲）同姓蘇（46歲）朋友從旁協助，三人同涉刑毀被捕，而蘇亦冇帶身份證出街。