西環噚日發生電車意外，好在嗰段路唔算多車，影響唔係咁大。喺晏晝近2點，一架由堅尼地城開出嘅電車向中環方向行駛，到山道車站前有段電纜斷開，搞到電車冇電行唔郁。
疑集電弓故障
事發時喺附近等緊落貨嘅郭先生話，電車行到分岔位時，電纜上面個連接裝置震咗幾下，跟住有段電纜斷咗，連接裝置亦跌落地，其間電纜有火花爆出，電車亦失去動力停低咗。
郭先生相信喺電車頂嘅集電弓故障同埋鬆脫，又話當時電車上嘅乘客唔多，大部份都好冷靜，事後車長請乘客落車。由於有電車阻住軌道，郭生話再經過時，睇到至少有6架電車嘅車龍，估計車長都請咗乘客落車，未見有人鼓譟。電車公司回覆話，噚日晏晝1點40分，山道車站附近一條集電杆鬆脫，令電纜輔助線受損，需要關閉電網搶修，電車服務受阻38分鐘，至2點46分回復正常。