暑假越嚟越近，立法會今個年度最後一次大會將於7月11日舉行，開完都放暑假。忙咗成年終於有得唞，立法會亦搞番場壓軸午間音樂會慶祝吓，呢次仲拉埋秘書長陳維安落場。
立法會喺7月13日下午1點開呢場音樂表演，稱得上做壓軸就梗係唔簡單，負責表演嘅係慈善團體青年音樂訓練基金，到時佢哋會表演5首樂曲，包括《Trumpet Voluntary》、《江河水》、《MOY 孩子的話》、《萬水千山縱橫》同埋《Auld Lang Syne》。
除咗青年音樂訓練基金，立法會嘅色士風好手經民聯盧偉國都會參加，喺《江河水》一曲中獨奏。相信高潮位就係《萬水千山縱橫》（關正傑原唱），因為醫學界陳沛然、專業議政葉建源會負責合奏，陳維安就做領唱。唔知佢哋幾位使唔使趁住仲有個幾月時間練吓歌先呢？