香港人分秒必爭，不過就算幾趕，揸車都應該小心。話說5月6號，新巴車長林先生喺下晝1點幾，駕駛8H線由小西灣去東華東院，當日由於好多人去拜山，巴士逼滿逾70人，馬路亦塞爆，架架車都要慢慢行。
根據林生提供嘅車cam片段睇到，當佢準備轉入環翠道時，有架黑色日產私家車，喺巴士右邊出現，仲闖入影線想打尖，林生冇讓佢行，私家車竟狼死到鏟上路中石壆同輾過路邊花槽，強行揳位成功爬頭，私家車呢幕猶如電影特技嘅場面，嚇到林生即刻急煞車，巴士即時搖骰仔，車上包括老人家都差啲企唔穩。
新巴繼續行咗一小段，林生忍唔住落車同塞緊車嘅私家車司機理論，「我成架車有老有嫩，出事你過唔過意得去？」點知對方唔道歉之餘，仲講粗口鬧林生「黐X線」，仲話自己已經打晒燈，林生唔讓係唔啱，爭持期間，有巴士乘客睇唔過眼，落車影低私家車，對方即時嬲嬲豬，又落車走去影巴士，擺明唔覺自己錯。