「聞一聞，好醒神？」土瓜灣東興大樓舊年起有變態賊不斷喺走廊偷女士胸圍底褲，搞到女居民人心惶惶，有住戶為咗搵出真兇，先後買咗3部保安閉路鏡頭緝兇。皇天不負有心人，禮拜二凌晨終於拍到一名光頭賊的廬山真貌，仲拍到佢當場「聞一聞」條底褲先偷，條片upload埋上網後，光頭佬即刻變網絡紅人。居民話𠵱家至少已有兩個底褲賊容貌曝光，希望警方可以盡快捉到人。
似shopping揀衫
居民謝先生同《蘋果》爆料，話一梯13伙嘅東興大樓每晚深夜至凌晨都冇保安員，好似冇掩雞籠，加上寓所唔夠位，居民習慣喺走廊晾曬內衣褲，但舊年開始不時都有賊深夜嚟偷胸圍底褲，搞到女士們包括謝太好無奈。謝生話舊年喺走廊裝第一個cam後，4月曾影到一個四眼仔偷內衣褲，但畫面唔夠清楚；後來買咗第2個cam又壞咗，唔服氣下今年買咗第3個cam，終於畀佢喺星期二凌晨4點影到一個光頭佬偷內衣褲。
條片見到光頭佬喺走廊偷咗一條大媽款女裝底褲後走埋一邊，聞一聞條底褲。謝先生當時聽到異聲開門查看，光頭佬已經走咗。但光頭佬唔死心，約5分鐘後返轉頭，好似shopping咁喺堆衫入面揀吓摷吓，最終被謝生喝走。
小記呢兩日訪問上址多名女居民，佢哋都話好擔心，擔心偷底褲賊會變本加厲，尤其是大廈後樓梯出現咗好核突的污迹。多名九龍城CID擒日去大廈調查，仲同居民攞咗賊人嘅相及片，希望警方盡快拉到人啦！
■記者劉柏麟、翁鈺輝