啱啱喺港島補選勝出嘅立法會議員區諾軒，近日密鑼緊鼓請人，開拓地區服務。區諾軒透過勞工處登廣告請人，以12,000元聘請一個社區幹事，朝11晚7，5天工作，相對其他民主派議員請助理嘅條件，算係咁喇，不過重點係呢份工嘅待遇，講明「有每月一天月事假」，如果咁計，一年就多12日假。睇嚟區諾軒相當關注女生嘅福祉。經常M痛到返唔到工嘅女性，不妨考慮吓。
咁呢份工工作範圍包括乜呢？廣告話主要喺香港仔返工，負責協助辦事處日常運作、處理求助及查詢個案、搞吓活動、如果識得文宣設計，就會獲優先考慮。如果要周六日公眾假期工作，區諾軒講明會有補假安排。申請人要有專上教育，起碼半年經驗，有責任感、可以獨立處事同埋守時。