唔少打工仔朝早返工都會經歷磨練，就係要逼入去睇落已經載滿人嘅港鐵車廂入面，好多時都會見到入面好多位，但奈何面對重重障礙，而背囊客同塞喺門口唔肯行入啲嘅人，先係令最勞氣嘅！好似早排就有人將兩個男人揹背囊嘅相放上facebook「公審」，話兩個大男人已經好大份，每人揹多個背囊佔咗一個位，結果公審變咗被公審，出po嗰個人反而畀人圍攻，「肥本身係原罪」、「拖篋嗰啲點計」、「波大都係罪，好在港女無波」、「大肚婆都話阻街啦」。
不過亦有人覺得平時冇咩所謂，但遇上地鐵好逼嗰陣一人讓一步，例如朝早返工人超級多，如果個個除低背囊其實會多好多空間，亦有網民話，塞喺門口頂住唔畀人入一樣咁乞人憎。其實好多國家例如韓國同新加坡，都有好多標語提醒背囊客放低背囊騰出多啲空位畀其他乘客，點解香港點都推唔郁？咪因為龐大嘅篋神團隊囉。