立法會就預算案審議工作噚日進入最後直路，立法會議員都關心表決完預算案後，會唔會立即處理建制派議員提出譴責熱血議員「泰博」鄭松泰嘅動議，因唔止民主派要留守保佢，建制派亦要預時間留低投票，點知出咗名鍾意提早收工的立法會主席梁君彥，好似知議員諗乜，提早通知議員昨日唔會處理泰博譴責動議，令民主、建制同泰博可以安心搞完預算案就收工。
泰博反口 發信求泛民撐
由於譴責泰博動議一旦通過，佢就會被DQ喪失議席，就算民主派一向同佢冇乜兩句，都預先傾好會坐定定阻止動議通過，點知梁君彥一早透過秘書處發出通告通知議員，講明處理完預算案就會休會，其他議程就會留返下星期三先處理，做法除咗令泰博可暫時鬆一口氣，亦令一班民主、建制派議員唔使咁緊張，亦可以早啲收工。
至於事件嘅主角泰博，上月中接受傳媒訪問時，話就話只會禮貌上通知泛民議員有譴責動議投票，但唔會特別拉票，而民主派又講明保佢，照計可以放心，不過話晒一旦通過動議，就會冇咗個位，正所謂口裏說不、身體卻很誠實，原來泰博今個月4號出咗封題為「反對由謝偉俊提出根據議事規則第49B（1A）條動議譴責鄭松泰的議案」信件畀全體議員，佢喺信中以「本席」自稱，話自己前年會議上是否行為不檢，是否合乎擔任立法會議員的資格，「只能由選民決定，議會不應剝奪選民的決定權」，想議員出席及投票，保護香港選民的政治權利，唔知咁又算唔算係拉票？
李八方