【《蘋果》專訪】韓國女團CLC的19歲香港成員莊錠欣（Elkie）昨日衣錦還鄉，撇甩隊友到鑽石山擔任「韓流舞蹈模仿大賽」評判，吸引粉絲逼滿商場，她更被粉絲搞喊。而Elkie完成活動後接受本報專訪，表示當初到韓國追夢做練習生不覺有壓力，同時又自爆喜歡乖及孝順的男生。
Elkie今次返港只逗留三日，所以未有時間見親友，她接受本報訪問時談到當初到韓國做練習生的感受：「因為當時只有一個目標，就係要出道，所以已經冇時間、冇心機諗有冇壓力，亦唔覺得好辛苦，而且我覺得係要咁樣諗先會達到自己嘅目標。」
近日首次出演韓劇《富家公子》的Elkie，飾演韓文不好的中國留學生，她大讚劇中對手男星金旻奎十分勤力，並說：「佢係一個好調皮、成日搞搞震嘅哥哥，佢仲成日整蠱我，不過因對方咁嘅性格，所以拍攝時都好愉快。」
另外，Elkie在活動前提到今次以韓國女團身份返港工作：「好神奇、好開心，好似返到屋企咁，因為真係首次咁樣返嚟。噚晚有去海傍，但當時已經太夜，對面海啲大廈都已經熄晒燈。」
計劃開騷
曾是童星的Elkie坦言有機會亦想與無綫的藝人合作，同時自爆CLC有來港開騷的計劃。Elkie表示最愛食菠蘿油及茶餐廳，亦曾在韓國整臘腸炒飯及港式公仔麵給隊友食。晒腿示人的Elkie一出場即以廣東話及韓文打招呼，表演時雖然音響兩次出現問題，但她亦十分專業繼續表演。當一眾參加者驚喜跳CLC歌曲《Black Dress》送給Elkie時，她即感動流淚。
採訪：文凱靈
攝影：林賓尼