狙擊梁振英UGL案嘅「天下為公」眾籌成績超預期，發起人就包括已故立法局議員吳明欽千金、民主黨小花吳思諾（Senia）。佢爹哋戰友何俊仁仲喺Senia初中中史科肥佬時開解佢，強調讀歷史嘅意義，在於以史為鑑，唔好重蹈覆轍。
中史合格全靠何俊仁
29歲嘅Senia中小學都讀傳統名校聖保祿學校，自細英文成績特別叻，會考、高考英文科都係A，中學參加英文辯論比賽，佢話多得媽媽自細帶佢去圖書館同書店睇英文書，「最初都係睇啲小朋友小說，有套書叫做《Baby-Sitters Club》」。中學開始做義工、幫手賣獎券、替長者清潔家居，久而久之令佢想將來嘅工作可以幫到人，故以港大法律系為首志願。
3歲時爸爸因血癌病逝，Senia對爹哋印象未必好深刻，但同爹哋戰友何俊仁則保持密切聯繫。佢話細個每年父親死忌，會同民主黨班Uncle一齊拜爸爸，記得初中時中史科肥佬唔開心，曾經好懊惱咁問仁哥，點解要讀中史？仁哥同佢講，讀歷史係警惕前人嘅錯誤，唔好再犯，Senia之後中史科無再肥佬咯。
Senia話最初入喺港大讀Law，覺得好辛苦，「辛苦到唔想做律師」，反而更享受大學暑假去柬埔寨農村做義工。大學期間曾經喺模擬法庭比賽勇奪最佳辯論員，其後到英國LSE讀埋法律碩士。原來有人話過Senia似劉心悠、蔡思貝同馮盈盈，大家又覺得似唔似？
李八方