民主派立法會議員本月7日晚聯同民陣喺立法會示威區（俗稱煲底）舉辦千人集會，聲援被建制派圍剿嘅港大副教授戴耀廷同香港嘅言論自由，當晚公民黨郭家麒為集會搭建舞台同豎立背板，遭立法會行管會警告，原來事件仲有餘波，行管會擬修改立法會示威區指引，禁止豎立任何舞台或背幕。
行管會透過立法會秘書處就修改「立法會廣場使用指引」諮詢議員，信中提及本月初集會豎立咗一個超出限制嘅舞台連背幕，行管會認為基於安全理由要修改指引，規定日後示威區內唔准豎設任何舞台或舞台連背景，或秘書處認為會對示威區人士構成安全危險嘅臨時構築物喎，議員要喺本周五前提出意見。指引仲訂明，若示威人士唔遵守指引，立法會行管會可拒絕有關人士進入示威區或要求佢哋離開，並可採取法律訴訟行動㖭噃。