唔知係咪拍片拍上癮？之前拍住Package男神劉鳴煒扮男團，拍片邀請青年自薦加入諮詢委員會嘅政務司長張建宗，可能開始有戲癮趁住「與司局長同行」計劃啟動，再度粉墨登場做宣傳大使。
呢次佢冇再擺出呃like手勢，可能想有另一種層次嘅演繹法，只見佢對住鏡頭，有啲凶人feel咁問：「你仲乜成日跟住我？」（但之後見佢似乎有啲忍笑……），然後大賣關子話：「係咪好想知道政務司司長嘅工作係點樣嘅呢……」
短短幾秒「精湛」演出，佢就做番政務司司長本業，坐定定推銷噚日起接受申請嘅「與司局長同行」計劃，大讚計劃有創意、破天荒，畀機會中四同中五同學仔有機會跟司局長做嘢，計劃5月11日截止，張建宗最後輕輕鬆同大家講：「暑假見」。